Ytste neset med fyrlykta er eit kjent mål for sundagsturen både for bygdefolk og tilreisande. Noko av myrområdet i Fjørtoftneset er freda; det same gjeld gravrøysene. Fjørtoftneset har vore myr og lynghei i fleire tusen år. Men no er den atlantiske lyngheia, som kulturlandskapet på Nordøyane er ein del av, sterkt truga. Ja, lyngheia er faktisk eit kulturlandskap; det er skapt av menneske som brende og hogg ned skogen for minst 3000 år sidan. Seinare har lyngmarkene vore brukte til beite, det er ikkje så lenge sidan at dei slutta å brenne lyng på Fjørtoft. Somme stader er det no planta furu og sitkagran, andre stader gror det att med kratt og lauvskog. Men Fjørtoftneset er framleis myr og lyng, og vonaleg får det lov til å vere det framover.